Juan Bautista Barandiaran da “Andoaingo Esteban Deunari Ereserkia” doinuaren egilea, eta Jose Mari Iriarte hitzen egilea. Hona abestiak zer dioen:
Agur Goiburu gaineko
kabi goxo laztana.
Agur San Esteban
gure zaindari
on zerana.
Bide latza izan arren
alai gatoz zugana
gogo onez azaltzera zuri
gure esker ona.
Entzun, bada, San Esteban,
eskatzen dizuguna,
gure herriak behar dun
bake ta zoriona.
40 urtetik gora jendaurrean abesten
70eko hamarkadaren bukaeran jaio zen abesbatza, eta hasiera-hasieratik euskal kantutegiaren eta musika sakro edo liturgikoa bidetik jo du batik bat.
Abesbatzako kideek sekula ez die muzin egin etorri zaizkien abesteko eskakizunei, abestea maite dutelako, eta aldi berean, ohartzen direlako herri baten kulturari ekarpen aberasgarria egiten diola abesbatza batek. Sorabilla auzoan, irailaren 8an, Koruko Ama Birjinaren egunearekin batera, daukate jarrita hurrengo hitzordua.
Honela mintzatu ziren bere zenbait kide, Aiurriri 2017ko ekainean eskaini zioten elkarrizketan:
“Gu beti-beti azaldu gara prest Andoaingo kultur giroa aberasteko, nola edo hala dakiguna eginez, kantatuz alegia. Inoiz ez diegu ezetzik esan herritik heldu zaizkigun parte hartzeko proposamenei: Sanjuan zein auzoetako jaietan, folklore jaialdietan, euskara eta euskal kulturaren aldeko ekitaldietan, kale ikuskizunetan, edonori eskerrak emateko omenaldietan… Jendea akaso ez da konturatuko, baina herri batentzat oso garrantzitsua da abesbatza edukitzea”.
Filosofia horri abesbatzak urtetan eta urtetan tinko eutsi izana eskertzeko asmoz, hain zuzen, 2017ko San Juan jaietan pregoia egiteko hautatu zuten Jai Batzordeko kideek. Pregoiaren kronika eta bideoa ikusgai dago.
